कोरोना उपचाराच्या जादा बिलांबाबत गुरुवारी | जिल्हा रुग्णालयात बैठक

अहमदनगर- कोरोना रुग्णांना उपचारादरम्यान आकारण्यात आलेल्या जादा बिलांबाबत कोरोना एकल महिला पुनर्वसन समिती व जनआरोग्य अभियान यांची बैठक आयोजित करण्यात आली आहे. गुरुवारी (दि. 2) दुपारी 1 वाजता जिल्हा रुग्णालयात होणाऱ्या या बैठकीसाठी सर्व तालुके आणि महापालिकेचे अधिकारी उपस्थित राहणार आहेत, अशी माहिती तालुका समन्वयक बाळासाहेब जपे यांनी दिली. ज्या तक्रारदारांचे खासगी हॉस्पिटलचे अतिरिक्त बिलांचे ऑडिट अजून झाले नाही, त्यांनी समितीच्या ग्रुपवर कळवावे, तसेच ज्यांचे ऑडिट झाले नाही किंवा जे तक्रारदार त्यांच्या ऑडिट प्रक्रियेशी समाधानी नाहीत, अशा तक्रारदारांनी बैठकीला उपस्थित राहून आपली बाजू मांडावी. ज्या तक्रारदारांना हॉस्पिटलकडून पैसे मिळाले व तक्रार नाही असे लिहून दिले आहे, त्यांनीदेखील ग्रुपवर कळविणे आवश्यक आहे. सर्व अहवाल राज्यपातळीवर पाठवण्यात येणार असल्याचे जपे यांनी सांगितले.