दोन गटातील लढाई तीव्र: शिंदे गटात सामील होण्यासाठी, शहराचा विकास थांबवण्याची
धमकी; महापौर जयश्री महाजनांचा गौप्यस्फोट

(जळगाव) प्रतिनिधी – शिवसेनेतील दोन गटांमधील वर्चस्वाची लढाई आता तीव्र होताना दिसत आहे. शिवसेनेतून कोणीही फुटणार नाही याची जशी काळजी घेतली जात आहे. अशातच शिंदे गटात सामिल करण्यासाठी प्रयत्न केला जात आहे. याची प्रचिती खुद्द महापौर जयश्री महाजन यांना आली आहे. शिंदे गटाला समर्थन न दिल्यास थेट शहराचा विकास थांबविण्याची धमकीच दिली जात असल्याचा गौप्यस्फोट महाजन यांनी माध्यमांशी बोलताना केला.

विकास थांबवण्याची धमकी

जळगाव शहरातील अयोध्या नगर भागात शुक्रवारी शिवसेनेच्या नवीन शाखेचे उद्घाटन करण्यात आले. यावेळी संपर्क प्रमुख संजय सावंत यांच्यासह शहर व जिल्ह्यातील प्रमुख पदाधिकारी उपस्थित होते. यावेळी माध्यमांशी बोलताना महापौर महाजन यांनी दोन गटांमधील वर्चस्वाची सुरू लढाई किती तीव्र झाली आहे याचे उदाहरण ठेवले. महापौरांना शिंदे गटात सामिल झालेल्या काही नगरसेवकांकडून निरोप देण्यात आले. उध्दव ठाकरेंचे समर्थन करण्याऐवजी एकनाथ शिंदे गटात सहभागी झाल्यास आता सुरू असलेल्या विकास कामांपेक्षा अधिक गतीने काम होतील. अन्यथा शहराचा विकास थांबवला जाईल. आगामी काळात अडचणी निर्माण केल्या जातील अशा धमक्याच दिल्या जात आहेत. परंतु या प्रकाराला आपण बळी पडणार नाहीत. शहराची निष्ठा महत्वाची असून शहरवासीयांच्या

विश्वासाला तडा जावू देणार नाही अशा शब्दात या पुढे ही शिवसेनेत राहणार असल्याचे महापौरांनी स्पष्ट केले.