घरफोड्या करणाऱ्या सराईत गुन्हेगाराला अटक स्थानिक गुन्हे शाखेची कारवाई.

अहमदनगर – अहमदनगर तालुक्यातील अकोळनेर व बाबुर्डी | घुमट या ठिकाणी घरफोड्या करणाऱ्या सराईत गुन्हेगाराला नगरच्या स्थानिक गुन्हे शाखेच्या पथकाने सापळा लावून शिताफीने पकडले आहे. सार्थक सगड्या काळे (वय 19, रा. सुरेगाव, ता. श्रीगोंदा) असे या आरोपीचे नाव आहे. नगर तालुक्यातील अकोळनेर शिवारात रेल्वेस्टेशन परिसरात असलेल्या पवार वस्ती येथे नीता अजित पवार यांच्या घरी अज्ञात चोरट्यांनी घराच्या छताच्या जिन्यातून घरात प्रवेश करत फिर्यादी पवार यांचा गळा दाबून 43 हजार रुपये किंमतीचे मंगळसूत्र व मोबाईल फोन चोरून नेला होता. याबाबत नगर तालुका पोलिस ठाण्यात गुन्हा दाखल करण्यात आला होता. या गुन्ह्याचा समांतर तपास करत असताना स्थानिक गुन्हे शाखेचे पो.नि. अनिल कटके यांना माहिती मिळाली की सदरची घरफोडी सार्थक काळे याने केलेली असून, चोरलेले सोन्याचे दागिने विकण्यासाठी तो सुपा येथील सोनाराकडे जाणार आहे. ही माहिती मिळताच पो. नि. कटके यांनी सपोनि सोमनाथ दिवटे यांच्या नेतृत्वाखाली पोलिसांचे पथक कारवाईसाठी पाठवले. या पथकाने सुरेगाव ते सुपा रोडवर सापळा लावला. आरोपी येताना दिसताच पथक त्याच्याकडे जाऊ लागले. पोलिसांची चाहूल लागताच तो शेतातून पळू लागला. पोलिसांनी त्याचा पाठलाग करूनत्याला पकडले. त्याच्याकडे कसून चौकशी केली असता त्याने अकोळनेर येथील घरफोडीबरोबरच बाबुर्डी घुमट येथील शेतातील वस्तीवर साथीदारांच्या मदतीने चोरी केल्याची कबुली दिली, पोलिसांनी त्याच्याकडून चोरीला गेलेले सोन्याचे दागिने व मोबाईल जप्त केला व त्याला पुढील तपासासाठी नगर तालुका पोलिसांच्या ताब्यात देण्यात आले आहे.